ساہیوال(چوہدری محمد آ صف ندیم آرائیں ڈویژنل بیوروچیف ) ممبر قومی اسمبلی رائے مرتضیٰ اقبال خاں کی زیر صدارت ڈسٹرکٹ کوارڈینیشن کمیٹی کا خصوصی اجلاس چیچہ وطنی میں منعقد ہوا جس میں کمشنر ساہیوال ڈویژن علی بہادر قاضی، آر پی او ڈاکٹر معین مسعود،ڈپٹی کمشنر محمد اویس ملک، ڈی پی او صادق بلوچ نے شرکت کی۔ تحریک انصاف کے رہنما شکیل خان نیازی، چوہدری نوریز شکور خاں،وحید اصغر ڈوگر، رانا آفتاب احمد خاں،ملک فیصل جلال ڈھکو، ملک محمد فیصل لنگڑیال،ڈاکٹر مظہر شیرازی اور ملک سجاد اعوان بھی اس موقع پر موجود تھے۔ آر پی او ڈاکٹر معین مسعود نے ضلع ساہیوال میں امن وامان کی صورتحال پرتفصیلی بریفنگ دی۔ انہوں نے بتایا کہ پولیس سٹریٹ کرائم روکنے کے لئے متحرک ہے۔ انہوں نے مزید بتایا کہ امن و امان کے لئے دیہات کی سطح پر عوام سے رابطہ مضبوط کر رہے ہیں۔تحریک انصاف کے رہنما شکیل خان نیازی نے ساہیوال شہر میں ٹریفک مینجمنٹ بہتر بنانے ضرورت پر زور دیا اور کہا کہ کمپری ہنسو سکول سے نہر کے ساتھ جھال روڈ تک بائی پاس سڑک بنائی جائے تاکہ ٹریفک جام جیسے مسائل سے بچا جا سکے۔ اجلاس سے خطاب کرتے ہوئے ایم این اے رائے مرتضی اقبال خان نے کہا کہ پولیس انڈر ایج ڈرائیونگ کی حوصلہ شکنی کرے تاکہ حادثات کو کم کیا جا سکے۔ انہوں نے کہا کہ سٹی پیکج کی سست روی سے عوام مشکلات کا شکار ہیں۔ انہوں نے ہدایت کی عوامی مشکلات کو کم کرنے کیلئے کام کی رفتار کو تیز کیا جائے۔ انہوں نے مزید کہا کہ تجاوزات ختم کرنا تحریک انصاف کی ترجیحات میں شامل ہے تاہم تجاوزات کے خلاف کارروائی میں رہڑی بانوں کو تنگ نہ کیا جائے۔ رائے مرتضی اقبال خان نے ہدایت کی کہ کسووال میں گرلز کالج کے لئے جگہ فوری مختص کرائی جائے۔انہوں نے مزیدکہا کہ اگلے رمضان میں 90 موڑ پر بھی رمضان بازار لگایا جائے تاکہ دور دراز مقیم عوام کو بھی سستی اشیاء صرف فراہم کی جا سکیں۔ انہوں نے اگلے مالی سال 2022-23 کے لئے ترقیاتی سکیموں کو جلد فائنل کرنے کی بھی ہدایت کی۔اس موقع پر ملک جلا ل ڈھکو نے کہا کہ کمپری ہنسو سکول سے مائی والی مسجد تک سیوریج لائن ڈالنے کے کام کی رفتار کو تیز کیا جائے تاکہ لوگوں کو جلد ریلیف مل سکے۔ رانا آفتاب احمد خاں نے کہا کہ سرکاری واجبات، کمرشلائیزیشن فیس اور کرایوں کی ریکوری کرائی جائے۔ملک فیصل جلال ڈھکو نے بتایا کہ ہڑپہ کی سیوریج سکیم غیر ضروری تاخیر کا شکار ہے۔ انہوں نے کہا کہ سیوریج سکیم میں حائل رکاوٹوں کو فوری دور کیا جائے۔ ڈپٹی کمشنر محمد اویس ملک نے اجلاس کے شرکاء کو 17 ارب روپے کے ساہیوال سٹی امپرومنٹ پیکج پر بریفنگ دی۔ انہوں نے بتایا کہ سٹی پیکج کے کام میں آنے والی روکاوٹوں کو دور کیا جا رہا ہے۔ انہوں نے مزید بتایا کہ ساہیوال شہر سے منڈیوں کی منتقلی کا عمل جاری ہے۔ ڈپٹی ڈائریکٹر ڈویلپمنٹ اکرم وٹو نے بتایا کہ ضلع بھر میں 652 ترقیاتی منصوں پر کام تیزی سے جاری ہے اور موجودہ مالی سال میں اب تک 9 ارب 29 کروڑ روپے خرچ ہو چکے ہیں۔
