موٹر سائیکلوں پر ون ویلنگ کرنیوالوں کیخلاف قانونی کارروائی عمل میں لائی جائے ۔چیف ٹریفک آفیسر عباس مجید خان مروت۔
ٹریفک وارڈنز اور اہلکار شہر بھر میں ٹریفک قوانین پر عملدرآمد کیلئے کارروائیاں مزید تیز کریں۔ اعلیٰ سطحی اجلاس سے خطاب
پشاور(نمائندہ خصوصی)گلوبل ٹائمز میڈیا رپورٹ کے مطابق چیف ٹریفک آفیسر عباس مجید خان مروت نے ٹریفک حکام اور اہلکاروں کو ہدایت کی ہے کہ وہ شہر کے تمام سیکٹروں میں اوور لوڈ گاڑیوں کیخلاف کارروائیوں کا سلسلہ مزید تیز کریں اور اس سلسلے میں کسی کیساتھ کوئی نرمی نہ برتی جائے ۔اس سلسلے میں ایک اجلاس زیر صدارت چیف ٹریفک آفیسر عباس مجید خان مروت منعقد ہوا جس میں ایس پی کینٹ ٹریفک امان اللہ‘ ایس پی سٹی ٹریفک عبد السلام خالد‘ ڈی ایس پیز سمیت ٹریفک آفیسرز اور ٹریفک وارڈنز نے شرکت کی۔چیف ٹریفک آفیسر عباس مجید خان مروت نے گزشتہ ہفتے سٹی ٹریفک پولیس پشاور کی جانب سے کی جانیوالی کارروائیوں کا تفصیلی جائزہ لیا۔اجلاس کے دوران چیف ٹریفک آفیسر عباس مجید خان مروت کو شہر بھر میں کی جانیوالی کارروائیوں سے متعلق بریفنگ دی گئی جس پر اطمینان کا اظہار کیا ۔انہوں نے کہا کہ شہر کے تمام سیکٹروں میں اوور لوڈ گاڑیوں کیخلاف کارروائی کی جائے اس سلسلے میں سٹی ٹریفک پولیس پشاور کے اہلکار آگاہی کا سلسلہ بھی جاری رکھیں انہوں نے ٹریفک وارڈنز اور اہلکاروں کو ہدایت کی کہ وہ تجاوزات مافیا بغیر ہیلمٹ کے ڈرائیونگ کرنیوالے موٹر سائیکل سواروں’ کالے شیشوں کے استعمال’ اوور لوڈنگ’ پریشر ہارن اور سیٹ بیلٹ باندھے بغیر ڈرائیونگ کرنیوالوں کے خلاف کارروائیاں مزید تیز کرنے اور پلازوں میں پارکنگ یقینی بنائیں اجلاس میں چیف ٹریفک آفسیر کو بتایا گیا کہ سٹی ٹریفک پولیس پشاور کی جانب سے تجاوزات مافیا کے خلاف کی جانیوالی کارروائیوں سے بازاروں سے تجاوزات کا خاتمہ کردیا گیا ہے جبکہ چیک اینڈ بیلنس کے لئے اہلکاروں کو تعینات کردیا گیا ہے جس پر چیف ٹریفک آفیسر عباس مجید خان مروت نے ٹریفک حکام اور اہلکاروں کی کارکردگی کو سراہا اور کہا کہ تجاوزات کے خلاف آپریشنز کا سلسلہ جاری رکھا جائے اور کسی کے ساتھ کوئی نرمی نہ برتی جائے۔چیف ٹریفک آفیسر عباس مجید خان مروت نے واضح کیا کہ نو پارکنگ زونز اور سڑک کے کنارے گاڑیاں کھڑی کرنے اور ٹریفک میں خلل ڈالنے والوں کیخلاف کارروائی عمل میں لائی جائے جبکہ شہر کے مختلف علاقوں میں لگائے جانیوالے ٹائر برسٹرز کا خصوصی دیکھ بھال کرنے سمیت متعلقہ محکمے سے اس کی بروقت صفائی کا بندوبست کریں۔انہوں نے مزید کہا کہ شہر میں بلا تعطل ٹریفک نظام رواں دواں رکھنے کے لئے تمام تر صلاحیتیں بروئے کار لائی جائیں اور اس سلسلے میں کسی قسم کی غفلت برداشت نہیں کی جائیگی جبکہ مرتکب افراد کے خلاف سخت قانونی کارروائی عمل میں لائی جائیگی۔
