ٹریفک افسران اور وارڈنز کی بہتر کارکردگی کی تعریف‘ شہریوں کو سفری سہولیات فراہم کرنے کی ہدایت۔
ٹریفک حکام قوانین پر عملدرآمد کو یقینی بنانے کیلئے جاری مہمات میں تیزی لائیں۔چیف ٹریفک آفیسر عباس مجید خان مروت
پشاور(نمائندہ خصوصی)چیف ٹریفک آفیسر عباس مجید خان مروت نے ٹریفک نظام کا جائزہ لینے کیلئے گزشتہ روز شہر کے مختلف مقامات کا دورہ کیا۔دورے کے دوران ڈی ایس پی ٹاؤن حضرت اللہ اور دیگر ٹریفک افسران بھی ان کے ہمراہ تھے۔چیف ٹریفک آفیسر عباس مجید خان مروت نے ٹریفک کی روانی اور سٹی ٹریفک پولیس پشاور کی جانب سے تجاوزات مافیا کے خلاف کی جانیوالی کارروائیوں کے نتیجے میں آنیوالی بہتری کا جائزہ لیا جبکہ سڑک کو ہر قسم کی ٹریفک کیلئے کلیئر کرنے پر ٹریفک افسران اور وارڈنز کی کارکردگی کی تعریف کی اور ٹریفک حکام کو ہدایت کی کہ وہ روزانہ کی بنیاد پر تجاوزات مافیا کے خلاف کارروائیاں کریں تاکہ شہریوں کو کسی قسم کے مشکلات درپیش نہ ہوں۔اسی طرح شہر کے مختلف علاقوں میں جاری مہمات کا بھی جائزہ لیا اور ٹریفک حکام کو شہر بھر میں کالے شیشوں ،اوور لوڈنگ, بغیر ہیلمٹ اور سیٹ بیلٹ کے بغیر گاڑیاں چلانے اور نو پارکنگ زونز کی خلاف ورزی کرنیوالوں کیخلاف کارروائیوں کو تیز کرنے کی ہدایت کی.انہوں نے کہا کہ ٹریفک عملہ فٹ پاتھوں کو تجاوزات مافیا سے واگزار کرائیں تاکہ پیدل چلنے والوں کو بھی کسی قسم کے مشکلات درپیش نہ ہوں اس سلسلے میں کسی کے ساتھ نرمی نہ برتی جائے۔چیف ٹریفک آفیسر عباس مجید خان مروت نے کہا ہے کہ بلا تعطل ٹریفک کی روانی بہتر بنانے کے لئے تمام تر صلاحیتیں بروئے کار لائی جائیں اور اس سلسلے میں کسی قسم کی غفلت برداشت نہیں کی جائیگی۔انہوں نے مزید کہا کہ ٹریفک پولیس افسران اور اہلکار پہلے سلام پھر کلام کی پالیسی پر عمل پیرا ہو کر شہریوں کو بہتر خدمات کی فراہمی یقینی بنائیں۔انہوں نے کہا کہ نو پارکنگ زون میں گاڑیاں کھڑی کرنے والوں کے خلاف قانون کے مطابق سخت کارروائی عمل میں لائیں کیونکہ غلط پارکنگ کی وجہ سے ٹریفک نظام بری طرح متاثر ہوتا ہے۔انہوں نے کہا کہ سٹی ٹریفک پولیس کا عملہ شہر بھر میں ٹریفک قوانین اور تجاوزات کے خاتمے کیلئے آگاہی کا سلسلہ جاری رکھیں کیونکہ اس کے بہتر نتائج سامنے آرہے ہیں۔انہوں نے کہا کہ تاجر برادری شہر سے تجاوزات کے خاتمے اور ٹریفک کی روانی کو یقینی بنانے کے لئے ٹریفک عملے کے ساتھ تعاون کرے۔
