اسسٹنٹ کمشنر جہلم آفتاب اشرف نے ایک منفرد اور ماحول دوست اقدام کرتے ہوئے مسیحی برادری کے افراد میں پودے تقسیم کیے

Spread the love

جہلم: ( بلال رضا) مسیحی برادری کے مقدس دن گڈ فرائیڈے اور ایسٹر کی مناسبت سے اسسٹنٹ کمشنر جہلم آفتاب اشرف نے ایک منفرد اور ماحول دوست اقدام کرتے ہوئے مسیحی برادری کے افراد میں پودے تقسیم کیے۔ اس تقریب کا مقصد مذہبی تہوار کی خوشیوں کو شجرکاری کے فروغ اور ماحولیاتی تحفظ کے ساتھ جوڑنا تھا۔ اس موقع پر مسیحی برادری کے معززین اور ضلعی انتظامیہ کے افسران بھی موجود تھے۔
اسسٹنٹ کمشنر جہلم آفتاب اشرف نے مسیحی برادری کو مبارکباد دیتے ہوئے کہا کہ پودے بانٹنا زندگی اور نمو کی علامت ہے، جو کہ ایسٹر کے پیغام سے گہرا تعلق رکھتا ہے۔ انہوں نے اس بات پر زور دیا کہ ہمیں اپنے شہر کو سرسبز و شاداب بنانے کے لیے مل کر کام کرنا چاہیے تاکہ آنے والی نسلوں کو ایک بہتر ماحول فراہم کیا جا سکے۔ انہوں نے مسیحی برادری کی ملک و قوم کے لیے خدمات کو بھی بھرپور خراجِ تحسین پیش کیا۔
مسیحی برادری کے شرکاء نے اسسٹنٹ کمشنر جہلم آفتاب اشرف کے اس اقدام کو بے حد سراہا اور کہا کہ پودوں کی تقسیم نے ان کی خوشیوں کو دوبالا کر دیا ہے۔ یہ اقدام نہ صرف بین المذاہب ہم آہنگی کو فروغ دیتا ہے بلکہ شجرکاری مہم میں عملی حصہ ڈالنے کی ترغیب بھی دیتا ہے۔ تقریب کے اختتام پر ملک کی ترقی اور خوشحالی کے لیے خصوصی دعا کی گئی۔

اس خبر پر اپنی رائے کا اظہار کریں

اپنا تبصرہ بھیجیں