پی پی 206 خانیوال ضمنی انتخاب غیر حتمی نتائج آنے کا سلسلہ جاری

Spread the love

خانیوال میں پنجاب اسمبلی کی نشست پی پی 206 کے ضمنی انتخاب کے غیر حتمی و غیر سرکاری نتائج آنے کا سلسلہ جاری ہے جہاں مسلم لیگ (ن) اور پاکستان تحریک انصاف کے درمیان مقابلہ ہے۔

اب تک کے 183 میں سے 145 پولنگ اسٹیشنز کے غیر حتمی و غیر سرکاری نتائج کے مطابق ن لیگ کے رانا محمد سلیم 37015 ووٹ لے کر آگے ہیں۔

پاکستان تحریک انصاف کی امیدوار نورین نشاط 25377 ووٹ لے کر دوسرے نمبر پر ہیں جبکہ پیپلز پارٹی کے میر واثق 11019 ووٹ لےکر تیسرے نمبر پر ہیں۔

خانیوال میں پی پی 206 کے ضمنی الیکشن کے لیے ہونے والی پولنگ صبح 8 بجے سے شام 5 بجے تک بغیر کسی وقفے کے جاری رہی۔

پی پی 206 کی نشست مسلم لیگ (ن) کے نشاط احمد ڈاہا کے انتقال کے باعث خالی ہوئی تھی، لیکن اس حلقے پر نشاط احمد ڈاہا کی اہلیہ نورین نشاط ڈاہا نے پاکستان تحریک انصاف کے ٹکٹ پر الیکشن میں حصہ لیا۔

اس حلقے میں 44 شہری وارڈ اور 6 دیہی یونین کونسل شامل ہیں۔

حلقے میں کل رجسٹرڈ ووٹرز کی تعداد 2 لاکھ 30 ہزار 698 ہے، جن میں مرد ووٹر کی تعداد ایک لاکھ 25 ہزار 190 اور خواتین ووٹرز کی تعداد ایک لاکھ 5 ہزار 508 ہے۔

حلقہ میں 183 پولنگ اسٹیشن بنائے گئے جن میں 62 مرد اور 60 خواتین جبکہ 61 مشترکہ پولنگ اسٹیشن تھے۔

ضمنی الیکشن میں مسلم لیگ (ن) کی جانب سے رانا محمد سلیم، پی ٹی آئی کی جانب سے نورین نشاط ڈاہا، پیپلز پارٹی کی جانب سے میر واثق سرجیس حیدر ترمذی، تحریک لبیک پاکستان کی جانب سے شیخ اکمل اور دیگر چار آزاد امیدوار حصہ لے رہے ہیں

اس خبر پر اپنی رائے کا اظہار کریں

اپنا تبصرہ بھیجیں