وزیرآباد(نامہ نگار) مسلم لیگ(ن) کا قلعہ آزاد امیدوار نے فتح کر لیا،محمد احمد چٹھہ قومی و صوبائی اسمبلی کی سیٹ پر کامیاب، مسلسل پانچ الیکشن جیتنے والی ن لیگ اپنی سیٹوں سے محروم،پی پی 35 سے مسلم لیگ(ن) کے امیدوار وقار احمد چیمہ کامیاب، جماعت اسلامی اور تحریک لبیک کے امیدوار دوڑ میں پیچھے رہ گئے، پی پی 35 کے رزلٹ پر بھی مبینہ دھاندلی کے الزامات، تاخیر سے رزلٹ جاری کیا گیا، عدالت میں جیت ثابت کریں گے، پی پی 35 سے آزاد امیدوارچوہدری محمد یوسف کے حامیوں کے نعرے۔ ضلع وزیرآباد کی واحد قومی اسمبلی اور صوبائی اسمبلی کی دو سیٹوں پر حیران کن نتائج سامنے آئے ہیں۔ گزشتہ تین جنرل الیکشن اور دو ضمنی الیکشن پانچ بار مسلسل جیتنے والی مسلم لیگ (ن) اپنی دو سیٹوں سے ہاتھ گنوا بیٹھی۔ این اے 66 میں سابق لیگی ایم این اے ڈاکٹر نثاراحمد چیمہ اور پی ٹی آئی کے حمایت یافتہ آزاد امیدوار محمد احمد چٹھہ کے درمیان مقابلہ دیکھنے میں آیا جس میں نثار چیمہ 100633 ووٹ حاصل کر پائے جبکہ انکے مقابل محمد احمد چٹھہ نے 160676 ووٹ حاصل کر کے 60 ہزار سے زائد ووٹوں کی برتری سے کامیابی اپنے نام کی۔ صوبائی حلقہ پی پی 36 سے بھی محمد احمد چٹھہ نے ن لیگ کے امیدوار عدنان افضل چٹھہ کو چاروں شانے چت کر دیا۔ آر او کی جانب سے جاری کئے گئے فارم 47 کے مطابق لیگی امیدوار عدنان افضل چٹھہ 49228 نے ووٹ حاصل کئے جبکہ محمد احمد چٹھہ ووٹ 87549 حاصل کر کے کامیابی سمیٹی۔ حلقہ پی پی 35 سے پی ٹی آئی کے حمایت یافتہ آزاد امیدوار چوہدری محمد یوسف اور لیگی امیدوار وقار چیمہ کے درمیان مقابلہ دیکھنے میں آیا جس میں چوہدری محمد یوسف ووٹ 59798 حاصل کر سکے اور انکے مد مقابل وقار چیمہ نے 60962 ووٹ حاصل کر کے تقریباً بارہ سو ووٹوں کی برتری سے کامیابی اپنے نام کی۔ چوہدری محمد یوسف کے حامیوں نے وقاراحمد چیمہ کی جیت کو ماننے سے انکار کرتے ہوئے کہا کہ تاخیر سے رزلٹ جاری کر کے نتائج تبدیل کئے گئے جس کو وہ عدالت میں ثابت کریں گے۔ واضح رہے کہ ن لیگ وزیرآباد سے تین جنرل اور 2 ضمنی مجموعی طور پر پانچ الیکشن کے بعد اپنی جیتی سیٹ سے ہاری ہے۔علاوہ ازیں وقار احمد چیمہ کو جیت کی خوشی میں سابق چیئرمین حاجی محمد سلیم دولہ،جنرل سیکرٹری ڈسٹرکٹ بار ایسوسی ایشن طاہر عمران کولار،سابق وائس چیئرمین محمد اکمل،حاجی محمد اشرف کدہ،محمد جاوید،خواجہ روحیل،میر ماجد علی سالار،خواجہ شعیب،وقار احمد چیمہ،عمران سنی کمبوہ،میر ایاز عامر،ارسلان بلوچ،محسن چیمہ،بیرسٹر عمر گوندل،عمران اکرم ٹھکراء،ڈاکٹر سید رضا سلطان،رضوان احمد چیمہ،علی اصغر چیمہ ودیگر نے مبارکباد اور مٹھائی تقسیم کی۔
