جیکب آباد (نامہ نگار) جیکب آباد کی گرمی نے ملک کے نامور اداکار ایوب کھوسہ کا حال بھی بے حال کردیا، بجلی کی بندش پر سخت رد عمل۔ تفصیلات کے مطابق جیکب آباد کی قیامت خیز گرمی نے ملک کے نامور اداکار ایوب کھوسہ کا حال بھی بے حال کردیا ہے، نامور اداکار ایوب کھوسہ نے اپنے سوشل میڈیا اکاؤنٹ پر ایک ویڈیو شیئر کی ہے جس میں وہ گرمی سے بے حال اور پسینے سے شرابور نظر آرہے ہیں، ویڈیو میں ایوب کھوسہ کا کہنا تھا کہ میں اس وقت جیکب آباد میں اپنے گاؤں میں موجود ہوں جیکب آباد کا شمار ملک کے گرم ترین علاقوں میں ہوتا ہے جہاں درجہ حرارت 51سینٹی گریڈ تک جاتا ہے پچھلے ایک دو روز تو مزید گرم تھے، انہوں نے کہا کہ اگر آپ اس طرح کے گرم ترین علاقے میں رہتے ہو اور آپ کو یہ انتظار ہو کہ بجلی آئے گی اور آپ سکون حاصل کرسکیں اس طرح سوچنا ہی اب باممکنات میں سے ہے اس لیے جتنا ہوسکے خود کو گرمی سے بچائیں پانی کا استعمال زیادہ کریں کپڑا گیلا کرکے اپنے سر اور گردن کو ڈھانپ کر باہر نکلیں میں نے بھی سر پر گیلا کپڑا باندھا ہوا ہے کیوں کہ میں کام کے سلسلے میں اپنی زرعی زمینوں پر جاؤنگا زمیداری کرنا اتنا آسان کام نہیں بہت مشکل ہے۔ البتہ بجلی کی محتاجی ہے اس سے بچ کر رہیں بجلی آگئی تو ٹھیک نہیں آئی تو زندہ باد۔
