وفاقی حکومت پنجاب کمیشن کی طرز پر اوورسیز کے لئے ادارہ قائم کرے۔۔۔فخراقبال
پی ٹی آئی سکاٹ لینڈ کے رہنما کی مشیر اوورسیز پاکستانی زلفی بخاری سے ملاقات
مانچسٹر( شکیل قمر)پاکستان سے آمدہ اطلاعات کے مطابق تحریک انصاف اسکاٹ لینڈ ایسٹ کے صدر فخر اقبال چوہدری نے وزیراعظم پاکستان کے معاون خصوصی برائے اوورسیز زلفی بخاری سے خصوصی ملاقات میں ان کو عالمی وباءکورونا کی وجہ سے سمندر پار پاکستانیوں کو درپیش مسائل سے آگاہ کیا اور حکومتی اقدامات پر اظہار اطمینان کیا ہے،اس موقع پر ممبر قومی اسمبلی طاھر اقبال چوھدری بھی موجود تھے ۔ فخر اقبال چوہدری نے کہاکہ حکومت کی جانب سے کورونا کی وجہ سے بیرون ملک پھنسے ہوئے پاکستانیوں کو وطن واپس لانے کےلئے کیے جانے والے اقدامات لائق تحسین ہیں۔ زلفی بخاری نے کہاکہ تارکین وطن کو پاکستان میں سرمایہ کاری کے حوالہ سے محفوظ ، منافع بخش اور سازگار ماحول کی فراہمی وزیراعظم عمران خان کی اولین ترجیح ہے۔ سید زلفی بخاری نے مزید کہاکہ اوورسیز پاکستانیوں کی جانب سے زرمبادلہ کی شکل میں پاکستان بھیجے جانے والا سرمایہ ملکی معیشت میں ریڑھ کی ہڈی کی حیثیت رکھتا ہے۔ فخر اقبال چوہدری نے مشیر وزیراعظم پاکستان سے مطالبہ کیا کہ پنجاب اورسیز پاکستانیز کمیشن کی طرز پر وفاقی حکومت بھی ادارہ قائم کرے تاکہ پنجاب کی طرح ملک بھر میں اوورسیز کے مسائل ترجیحی بنیادوں پر حل ہو سکیں ۔فخر اقبال چوھدری نے مطالبہ کیا کہ گلاسگو / ایڈانبرا اسکاٹ لینڈ سے پاکستان کےلئے ڈائریکٹ پروازوں کے لیے اقدامات کیے جائیں جبکہ ائیرپورٹس پر بیرون ملک سے آنے والے افراد کی سہولیات کے لئے جامع حکمت عملی وضع کی جائے ۔فخر اقبال چوہدری نے کہا کہ ہر مشکل اور کٹھن مرحلے میں اوورسیز پاکستانیوں نے وطنِ عزیز کے ساتھ والہانہ محبت کا اظہار کیا ہے، حکومت تارکینِ وطن کو پاکستان میں سرمایہ کاری کی ترغیب دینے کے لیے خصوصی پیکج کا بھی اعلان کرے۔
