مثبت اور خیر خواہانہ جذبے سے معاشرے کی تربیت و اصلاح سالانہ جلسے کا بنیادی مقصد ہے۔
جہلم( محمد زاہد خورشید) جامعہ علوم أثریہ جہلم کا 41واں سالانہ جلسہ و تقریب تکمیل صحیح بخاری شریف و تقسیم اسناد و انعامات زیر صدارت رئیس الجامعہ حافظ عبدالحمید عامر 9نومبر بروز ہفتہ بعد از نماز عصر 03:15بجے سے شروع ہو کر رات گئے تک ہو گا۔ پروگرام کا آغاز نماز عصر کے فوراً بعد ہو جائے گا۔ نماز عصر کے بعد 03:15 بجے منکرین حدیث کے اعتراضات کے جائزہ کے موضوع پر جامعہ کے شیخ الحدیث مولانا سیف اللہ عبدالرحیم اثری درس ارشاد فرمائیں گے۔ 03:50بجے بخاری شریف کی آخری حدیث پردرس شیخ الحدیث جامعہ سلفیہ فیصل آباد مولانا حافظ مسعود عالم کا ہو گا۔ بعد از نماز عشاء سالانہ جلسہ تقسیم اسناد سے قاری خلیل الرحمن جاوید آف کراچی، علامہ معتصم الٰہی ظہیر بن شہید ملت علامہ احسان الٰہی ظہیر،مولانا حافظ یوسف پسروری، مولانا سیدطیب الرحمن زیدی اور مولانا نواز چیمہ خطاب کریں گے۔ اس موقع پر جامعہ کے فارغ التحصیل طلباء کو اسناد بھی دی جائیں گی اور نمایاں پوزیشن حاصل کرنے والے طلباء میں انعامات تقسیم کیے جائیں گے۔ سالانہ جلسہ کے انتظامات کو حتمی شکل دینے کے لیے منعقدہ ایک اجلاس میں خطاب کرتے ہوئے انہوں نے کہا کہ مثبت اور خیر خواہانہ جذبے سے معاشرے کی تربیت و اصلاح سالانہ جلسے کا بنیادی مقصد ہے۔لوگوں کے سامنے عقائد اسلام اور مسائل دین کو صحیح شکل میں پیش کرنا ہماری سالانہ تقریب کے اہداف میں شامل ہے۔سالہا سال سے بفضل باری تعالیٰ ہم اپنے اسی اسلوب و منہج کو لے کر چل رہے ہیں۔
