وزیرآباد(طارق جاوید ملک) ملک میں کھیلوں کی ترقی کے لئے بھر پور اقدامات کی ضرورت ہے۔ پاکستان میں کھیلوں کا بے پناہ ٹیلنٹ موجود ہے اور اس ٹیلنٹ کو نکھارنے کے لئے حکومت اور فیڈریشنز کو مل کے ٹھوس اقدامات کرنے چاہئیں۔ کوئی بھی کھیل حکومتی اور سپانسر کی سرپرستی کے بغیر ترقی نہیں کر سکتا۔ ان خیالات کا اظہار باو سلیم اور معروف فٹ بال کوچ نادر علی نے دوسرے آل پنجاب عامر گجر میموریل فٹ بال ٹورنامنٹ میں فرینڈز فٹ بال اور آر اے سی سی کلب کے درمیان کھیلے جانے والے میچ کے موقع پر کیا۔دوسرے عامر گجر میموریل آل پنجاب فٹبال ٹورنامنٹ میں فرینڈز فٹبال کلب وزیرآباد نے اپنا پہلا میچ ٹیم آر اے سی سی سیالکوٹ سے 0-4 کی برتری سے جیت کر کوارٹر فائنل کیلئے کوالیفائی کر لیا۔ فرینڈز فٹبال کلب کی جانب سے باسط نادر، اسفند یار، خاور سلیم اور بلو بھائی نے ایک ایک گول کیا۔ اس موقع پر باؤ سلیم اور کوچ نادر علی کا کہنا تھا کہ ٹیم اچھا کھیلی ہے اس لیے جیت اپنے نام کی۔کپتان مبارک علی نے کہا کہ کھلاڑیوں کے حوصلے بلند ہیں اور جیت کا سلسلہ ایسے ہی برقرار رکھتے ہوئے فائنل بھی اپنے نام کرینگے۔
