سیمینار کا مقصد کمیونٹی کی شمولیت کو مضبوط بنانا اور پولیو ویکسینیشن کیلئے شعور اجاگر کرنا تھا۔
پشاور(نمائندہ خصوصی)پولیو کے خاتمے کے حوالے سے آگاہی سیمینار کا انعقاد کیا گیا۔ اس سیمینار کا مقصد کمیونٹی کی شمولیت کو مضبوط بنانا اور پولیو ویکسینیشن کے لیے شعور اجاگر کرنا تھا۔سیمینار میں ڈپٹی کمشنر پشاور سرمد سلیم اکرم، ایڈیشنل ڈپٹی کمشنر (جنرل) راؤ ہاشم عظیم،خیبرپختونخوا یوتھ اسمبلی کے وزیر اعلی ڈاکٹر محمد عاطف خان،جنرل سیکرٹری اسامہ ہمایون،وزیر زراعت ڈاکٹر تاجدار عالم، وزیر اطلاعات نصراللہ حسرت،وزیر برائے کھیل عارف اللہ،
عوامی نمائندگان، مذہبی شخصیات، کمیونٹی مشران، سرکاری حکام اور سماجی شخصیات نے شرکت کی۔شرکاء نے تقریب کے مقاصد پر روشنی ڈالی اور مختلف شعبوں کے تعاون کو پولیو فری پاکستان کے لیے ناگزیر قرار دیا اورپولیو کے خاتمے کی جاری کوششوں، کامیابیوں اور چیلنجز پر تفصیلی بریفنگ دی گئی۔ ڈپٹی کمشنر پشاور سرمد سلیم اکرم نے کمیونٹی کے اثر و رسوخ رکھنے والے افراد اور مذہبی شخصیات کے کردار پر زور دیتے ہوئے والدین کے ویکسینیشن کے حوالے سے خدشات کو دور کرنے کی تاکید کی اور پولیو مہم کے تسلسل کی ضرورت پر زور دیا۔تقریب کے اختتام پر ڈپٹی کمشنر پشاور نے بچوں کو پولیو کے قطرے پلا کر مہم کا باقاعدہ افتتاح کیا۔تقریب میں صحت و صفائی کے شعور کو اجاگر کرنے کے لیے شرکاء میں ہائجین کٹس تقسیم کی گئیں۔ ڈپٹی کمشنر پشاور سرمد سلیم اکرم کے مطابق یہ سیمینار پولیو کے خاتمے کے لیے جاری کوششوں میں ایک اہم سنگِ میل ثابت ہوگا۔
