نئی آبادی روڈ کی خستہ حالی اور تاخیری حربوں پر شدید تشویش کا اظہار

Spread the love

بہارہ کہو: الفلاح مینجمنٹ کمیٹی کا ہنگامی اجلاس، نئی آبادی روڈ کی خستہ حالی اور تاخیری حربوں پر شدید تشویش کا اظہار

بہارہ کہو کی سب سے بڑی فلاحی تنظیم الفلاح مینجمنٹ کمیٹی، نئی آبادی کا ہنگامی جنرل باڈی اجلاس آج چیئرمین سید مختار حسین شاہ صاحب اور صدر عدنان عباسی صاحب کی صدارت میں منعقد ہوا۔ اجلاس میں علاقے کے معززین اور کمیٹی ممبران کی کثیر تعداد نے شرکت کی۔

اجلاس کے شرکاء نے نئی آبادی مین روڈ کی کارپٹنگ کے منصوبے میں مجرمانہ تاخیر پر شدید غم و غصے اور مذمت کا اظہار کیا۔ متفقہ قرارداد کے ذریعے اربابِ اختیار سے پُرزور مطالبہ کیا گیا کہ روڈ کی تعمیر و پختگی کا کام فوری طور پر شروع کیا جائے۔

قرارداد کے اہم نکات:

1. ٹھیکیدار کی غفلت: ٹھیکیدار نے کارپٹنگ کے نام پر پرانی سڑک کو مکمل طور پر اکھاڑ دیا ہے اور گزشتہ دو ماہ سے کام بند کر کے روپوش ہے۔
2. عوامی مشکلات: اکھاڑی گئی سڑک بارش کے بعد ندی نالوں کا منظر پیش کر رہی ہے۔ کھڑے گندے پانی کی وجہ سے علاقے میں مچھروں کی بہتات ہو چکی ہے، جس سے ڈینگی اور دیگر وبائی امراض پھیلنے کا شدید خدشہ ہے۔
3. ہزاروں شہری متاثر: سڑک کی تباہ حالی کے باعث اسکول جانے والے بچے، بزرگ، مریض اور روزانہ سفر کرنے والے ہزاروں شہری شدید اذیت کا شکار ہیں۔ کاروباری سرگرمیاں بھی بری طرح متاثر ہو رہی ہیں۔

الٹی میٹم:
الفلاح مینجمنٹ کمیٹی نے واضح کیا ہے کہ اگر ایک ہفتے کے اندر تعمیراتی کام دوبارہ شروع نہ کیا گیا تو اہلیانِ نئی آبادی اپنے آئینی حق کو استعمال کرتے ہوئے پرامن احتجاج کرنے پر مجبور ہوں گے، جس کی تمام تر ذمہ داری متعلقہ محکموں اور ٹھیکیدار پر عائد ہوگی۔

کمیٹی نے وفاقی وزیر ڈاکٹر طارق فضل چوہدری، ایم این اے، اور ضلعی انتظامیہ و مقامی قیادت سے فوری نوٹس لینے کا مطالبہ کیا ہے تاکہ عوام کو اس کرب سے نجات دلائی جا سکے۔

منجانب:
الفلاح مینجمنٹ کمیٹی، نئی آبادی بہارہ کہو

اس خبر پر اپنی رائے کا اظہار کریں

اپنا تبصرہ بھیجیں