
سبی رپورٹ بیورو چیف بلوچستان ملک بشیر احمد مندوانی رند
سبی: سلطان پریمئر لیگ ایڈیشن 2 کا شاندار اور سنسنی خیز فائنل میچ السادات گراؤنڈ ریلوے سبی میں کھیلا گیا، جہاں بلیدی ہیروز کلب سبی اور خان خدا داد خان مرغزانی کلب سبی کے درمیان کانٹے دار مقابلہ دیکھنے کو ملا۔ شائقین کرکٹ کی بڑی تعداد گراؤنڈ میں موجود رہی اور کھلاڑیوں کی بھرپور حوصلہ افزائی کرتی رہی۔
فائنل میچ میں خان خدا داد خان مرغزانی کلب سبی نے ٹاس جیت کر پہلے بیٹنگ کا فیصلہ کیا۔ ٹیم کی جانب سے عمران خان مرغزانی نے شاندار اور جارحانہ بیٹنگ کا مظاہرہ کرتے ہوئے صرف 22 گیندوں پر 68 رنز کی دھواں دار اننگز کھیلی، جبکہ ایک اور بلے باز نے 10 گیندوں پر 35 رنز بنا کر ٹیم کے مجموعے میں اہم اضافہ کیا۔ بلیدی ہیروز کلب کی جانب سے اعجاز بلیدی نے عمدہ باؤلنگ کرتے ہوئے 3 اہم وکٹیں حاصل کیں۔
جواب میں بلیدی ہیروز کلب سبی نے ہدف کا پراعتماد انداز میں تعاقب کرتے ہوئے صرف 10ویں اوور میں مطلوبہ اسکور حاصل کر کے سلطان پریمئر لیگ ایڈیشن 2 کا ٹائٹل اپنے نام کر لیا۔ فتح میں وسیم بلیدی نے مرکزی کردار ادا کرتے ہوئے 30 گیندوں پر 70 رنز کی شاندار اور میچ وننگ اننگز کھیلی۔
ٹورنامنٹ میں مجموعی طور پر 8 ٹیموں نے حصہ لیا، جبکہ ایونٹ کے کامیاب انعقاد میں ٹورنامنٹ آرگنائزرز قاسم خان مرغزانی، سید حاجی شاہ، سید بلال شاہ، شاہ زیب کھوسہ، زوہیب ابڑو، ظہیر ابڑو، احسان ابڑو اور وراث کھوسہ نے اہم کردار ادا کیا۔
فائنل میچ کے امپائرز جبار سومرو اور اعجاز ہوتی تھے، جبکہ کمنٹری کے فرائض خادم اسپورٹس اور مرتضیٰ خان خجک نے سرانجام دیے۔
اختتامی تقریب میں دونوں فائنلسٹ ٹیموں کو نقد انعامات (کیش پرائزز) دیے گئے۔ شاندار مقابلوں، بہترین انتظامات اور پرجوش ماحول نے سلطان پریمئر لیگ ایڈیشن 2 کو سبی کی کرکٹ تاریخ کا ایک یادگار ایونٹ بنا دیا۔
