وزیرآباد(نامہ نگار)عوامی شکایات کے ازالے کے لیے اسسٹنٹ کمشنر آفس میں کھلی کچہری کا انعقاد، موقع پر احکامات جاری۔حکومتِ پنجاب کی خصوصی ہدایات کی روشنی میں عوام کو ان کی دہلیز پر انصاف اور ریلیف کی فراہمی کے لیے ضلعی انتظامیہ متحرک ہے۔ اس سلسلے میں اسسٹنٹ کمشنر وزیرآباد جواد حسین پیرزادہ نے اپنے دفتر میں ایک کھلی کچہری کا انعقاد کیا۔ اس کھلی کچہری میں تحصیل وزیرآباد کے مختلف شہری و دیہی علاقوں سے بڑی تعداد میں آئے ہوئے سائلین نے شرکت کی اور انتظامیہ کے سامنے اپنے انفرادی اور اجتماعی نوعیت کے مختلف مسائل، شکایات اور درخواستیں پیش کیں۔اسسٹنٹ کمشنر جواد حسین پیرزادہ نے کچہری میں موجود تمام درخواست گزاروں کی شکایات اور بنیادی مسائل کو انتہائی توجہ اور بغور سنا۔ انہوں نے عوامی سفری صعوبتوں کو مدنظر رکھتے ہوئے سست روی کا شکار معاملات پر متعلقہ محکموں کے افسران سے موقع پر ہی رابطہ قائم کیا۔ اسسٹنٹ کمشنر نے موقع پر موجود اور آن لائن افسران کو سخت ہدایات جاری کیں کہ تمام جائز عوامی مسائل کو قانون اور میرٹ کے مطابق، بغیر کسی سفارش کے، ایک مقررہ اور محدود مدت کے اندر حل کیا جائے اور اس کی تفصیلی تعمیلی رپورٹ فوری طور پر اسسٹنٹ کمشنر آفس میں پیش کی جائے۔اس موقع پر میڈیا اور شہریوں سے گفتگو کرتے ہوئے جواد حسین پیرزادہ کا کہنا تھا کہ عوام کو بروقت، شفاف اور میرٹ پر مبنی خدمات کی فراہمی حکومتِ پنجاب کی اولین ترجیحات میں شامل ہے۔ انہوں نے واضح کیا کہ ضلعی انتظامیہ وزیرآباد شہریوں کے روزمرہ کے مسائل کے فوری، شفاف اور مؤثر حل کے لیے دن رات کوشاں ہے اور اس سلسلے میں سرکاری دفاتر کے چکر کاٹنے کے کلچر کو ختم کیا جا رہا ہے۔ انہوں نے وارننگ دی کہ عوامی خدمات کی فراہمی میں کسی بھی افسر یا اہلکار کی جانب سے سستی، غفلت یا تاخیر کو ہرگز برداشت نہیں کیا جائے گا اور پبلک ڈیلنگ کو مزید بہتر بنایا جائے گا۔آخر میں ضلعی انتظامیہ وزیرآباد کی جانب سے عوام الناس سے پرزور اپیل کی گئی کہ وہ اپنے تمام جائز مسائل اور شکایات کے حل کے لیے بلا جھجک متعلقہ سرکاری دفاتر اور کھلی کچہریوں سے رجوع کریں اور کرپشن یا کوتاہی کے خلاف انتظامیہ کے ساتھ بھرپور تعاون کو یقینی بنائیں تاکہ ضلعی سطح پر عوامی خدمت کے مجموعی معیار کو مزید بہتر اور مثالی بنایا جا سکے۔
