رحیم یار خان میں موسلا دھار بارش، نشیبی علاقے زیر آب، ڈیڑھ گھنٹے میں 42 ملی میٹر بارش ریکارڈ، ریسکیو 1122 کی امدادی سرگرمیاں جاری

Spread the love

رحیم یار خان
(میاں طالب حسین،
ڈویژنل بیوروچیف)

رحیم یار خان شہر اور گردونواح میں ہونے والی موسلا دھار بارش کے باعث متعدد نشیبی علاقے زیر آب آ گئے، جبکہ سڑکوں اور گلی محلوں میں پانی جمع ہونے سے شہریوں کو شدید مشکلات کا سامنا کرنا پڑا۔ محکمہ موسمیات کے مطابق صرف ڈیڑھ گھنٹے کے دوران 42 ملی میٹر بارش ریکارڈ کی گئی، جس کے باعث معمولاتِ زندگی متاثر ہوئے۔
شدید بارش کے دوران مختلف شاہراہوں، بازاروں اور رہائشی علاقوں میں بارش کا پانی جمع ہونے سے ٹریفک کی روانی بھی شدید متاثر رہی۔ کئی مقامات پر گاڑیاں اور موٹر سائیکلیں پانی میں پھنس گئیں جبکہ شہریوں کو آمد و رفت میں دشواری کا سامنا کرنا پڑا۔
بارش کے بعد ریسکیو 1122 کی ٹیمیں فوری طور پر متحرک ہو گئیں اور مختلف متاثرہ علاقوں میں امدادی سرگرمیوں کا آغاز کر دیا۔ ریسکیو اہلکار نشیبی علاقوں سے پانی کے اخراج، شہریوں کی مدد، پھنسے ہوئے افراد کو محفوظ مقامات تک منتقل کرنے اور ہنگامی صورتحال سے نمٹنے کے لیے مصروف عمل ہیں۔
ضلعی انتظامیہ، میونسپل کارپوریشن اور دیگر متعلقہ اداروں نے بھی نکاسی آب کے عمل کو تیز کر دیا ہے۔ واسا اور میونسپل عملہ مختلف مقامات پر موجود رہ کر مشینری کی مدد سے سڑکوں اور بازاروں سے پانی نکالنے میں مصروف ہے تاکہ شہریوں کو جلد از جلد ریلیف فراہم کیا جا سکے۔
ریسکیو 1122 اور ضلعی انتظامیہ نے شہریوں سے اپیل کی ہے کہ بارش کے دوران غیر ضروری سفر سے گریز کریں، بجلی کی کھلی تاروں اور پانی میں ڈوبے ہوئے برقی آلات سے دور رہیں، جبکہ کسی بھی ہنگامی صورتحال میں فوری طور پر ریسکیو 1122 سے رابطہ کریں۔
محکمہ موسمیات نے آئندہ چند گھنٹوں کے دوران مزید بارش کے امکان کا بھی اظہار کیا ہے، جس کے پیش نظر متعلقہ اداروں کو الرٹ رہنے اور شہریوں کو احتیاطی تدابیر اختیار کرنے کی ہدایت کی گئی ہے۔

اس خبر پر اپنی رائے کا اظہار کریں

اپنا تبصرہ بھیجیں