جہلم(چوہدری عابد محمود +دانیال عابد چوہدری)جہلم شہرو گردونواح میں مہنگائی عروج پر، عوام کی مشکلات میں اضافہ، بااثر دکاندار غیر معیاری اشیائے خوردونوش انتہائی مہنگے داموں فروخت کرنے میں مصروف، انتظامیہ کی جانب سے جاری کئے گئے نرخ نامے غائب، شہری مہنگے داموں اشیائے خوردونوش خریدنے پر مجبور، عوامی، سماجی، شہری حلقوں کا اربا ب اختیار سے نوٹس لینے کا مطالبہ، تفصیلات کے مطابق شہرسمیت مضافاتی علاقوں میں مہنگائی نے غریب سفید پوش طبقہ سے تعلق رکھنے والے افراد کی مشکلات میں بے پنا ہ اضافہ کر دیا ہے، بااثر دکاندار سرکاری نرخ ناموں پر اشیاء خوردونوش فروخت کرنے کی بجائے خود ساختہ نرخوں پر اشیاء فروخت کر رہے ہیں، ناجائز منافع خوروں اور ذخیرہ اندوزوں نے اشیائے خوردونوش کو غریب طبقہ کی پہنچ سے کوسوں میل دور کر کے مشکلات میں اضافہ کر دیا ہے، پھلوں کا استعمال اب ایلیٹ کلاس اور اونچے طبقے تک محدود ہو کر رہ گیا ہے، غریب متوسط طبقہ اپنے گھروں کے لئے دال سبزی لے جانے سے بھی محروم دکھائی دیتا ہے، خود ساختہ مہنگائی کے باعث انتظامیہ کی جانب سے کسی قسم کی کوئی کارروائی عمل میں نہیں لائی جا رہی جس کی وجہ سے دکانداروں نے ضلع بھر میں جنگل کا قانون نافذ کر رکھا ہے، انتظامیہ ماہ رمضان میں کارروائیاں کرکے ایک مہینہ اشیاء خوردونوش کے نرخوں کو اعتدال پر رکھ کر گیارہ مہینے دکانداروں کو لوٹ مار کرنے کے لئے دے دیتی ہے، عوامی، سماجی، شہری، رفاعی تنظیموں کے عمائدین نے ارباب اختیار سے صورت حال کا نوٹس لینے کا مطالبہ کرتے ہوئے کہا کہ اشیائے خوردونوش کی قیمتوں کو کنٹرول میں رکھنے کے لئے پرائس کنٹرول مجسٹریٹس کو متحرک کیا جائے اور نرخ نامے آویزاں نہ کرنے والے دکانداروں کے خلاف فوجداری مقدمات درج کروائے جائیں تاکہ غریب سفید پوش طبقہ سے تعلق رکھنے والے افراد کے گھروں کے چولہے جل سکیں۔
