رحیم یار خان
میاں طالب حسین
(ڈویژنل بیوروچیف)
پنجاب بار کونسل کے ممبر اور ہائی کورٹ کے سینئر وکیل چوہدری اختر محمود چہور ایڈووکیٹ نے کہا ہے کہ ان کے پاس آنے والے تمام سائلین کے مقدمات کو میرٹ کی بنیاد پر دیکھا جاتا ہے اور وہ ہمیشہ انصاف اور قانون کے تقاضوں کو اولین ترجیح دیتے ہیں۔ وسائل سے محروم افراد کے لیے ان کے دروازے ہر وقت کھلے ہیں اور وہ ان کے مقدمات کی بھرپور قانونی معاونت کرنے کی کوشش کرتے ہیں۔
میڈیا سے گفتگو کرتے ہوئے چوہدری اختر محمود چہور ایڈووکیٹ نے کہا کہ انہوں نے اپنی وکالت کے دوران ہمیشہ میرٹ کو ترجیح دی ہے اور اہم نوعیت کے مقدمات میں بھی قانون اور انصاف کے تقاضوں کے مطابق مؤقف اختیار کیا۔ ان کا کہنا تھا کہ ایک وکیل کی اصل ذمہ داری اپنے مؤکل کو قانونی رہنمائی فراہم کرنے کے ساتھ ساتھ انصاف کے حصول میں اس کی بھرپور معاونت کرنا ہے۔
انہوں نے کہا کہ ایسے افراد جو مالی وسائل نہ ہونے کے باعث اپنے مقدمات کی مناسب پیروی نہیں کر سکتے، وہ بلاجھجک ان سے رابطہ کر سکتے ہیں۔ وہ اپنی استطاعت کے مطابق ان کے مقدمات کو میرٹ پر لڑنے اور انہیں انصاف دلانے کے لیے بھرپور کوشش کریں گے۔
چوہدری اختر محمود چہور ایڈووکیٹ نے بتایا کہ ان کے صاحبزادے صہیب چہور ایڈووکیٹ ہائی کورٹ بہاولپور میں بھی وکالت کے شعبے سے وابستہ ہیں اور میرٹ اور قانون کے اصولوں کے مطابق اپنی پیشہ ورانہ ذمہ داریاں انجام دے رہے ہیں۔ انہوں نے کہا کہ انہیں اس بات پر فخر ہے کہ انہوں نے اپنے بچوں کی اچھی تربیت کی اور آج وہ بھی اپنے پیشہ ورانہ فرائض دیانت داری اور میرٹ کے اصولوں کے تحت انجام دے رہے ہیں۔
انہوں نے مزید کہا کہ آج وہ جس مقام پر موجود ہیں، اس میں ان کے دوستوں، بھائیوں اور وکلا برادری کے تعاون کا بھی اہم کردار ہے۔ وہ آئندہ بھی وکلا برادری کے ساتھ کھڑے رہیں گے اور ان کے جائز مسائل کے حل کے لیے اپنی بھرپور صلاحیتیں بروئے کار لائیں گے۔
چوہدری اختر محمود چہور ایڈووکیٹ نے کہا کہ اپنے سابقہ دور میں انہوں نے وکلا برادری کی سہولت کے لیے چہور بلاک کی تعمیر سمیت متعدد ترقیاتی کام کروائے، جو آج بھی ان کی عملی کاوشوں کا ثبوت ہیں۔ پنجاب بار کونسل کے موجودہ رکن کی حیثیت سے بھی ان کی کوشش ہوگی کہ وکلا برادری کے مسائل کے حل، فلاح و بہبود اور پیشہ ورانہ حقوق کے تحفظ کے لیے ہر ممکن اقدامات کیے جائیں۔
انہوں نے اس عزم کا اظہار کیا کہ وہ قانون، انصاف اور میرٹ کی بالادستی کے لیے اپنی جدوجہد جاری رکھیں گے اور وکلا برادری کے ساتھ مل کر ان کے جائز مسائل کے حل کے لیے اپنا کردار ادا کرتے رہیں گے۔
