گورنمنٹ کالونی سیکنڈری اسکول رحیم یار خان میں 35 کلو واٹ سولر سسٹم کا افتتاح، تقریب کا شاندار انعقاد

Spread the love


​رحیم یار خان
(میاں طالب حسین،
ڈویژنل بیوروچیف)

گورنمنٹ کالونی سیکنڈری اسکول، رحیم یار خان کی ترقی اور جدید تعلیمی سہولیات کی فراہمی کے سفر میں ایک اور اہم سنگِ میل عبور کر لیا گیا۔ اسکول میں 35 کلو واٹ کے جدید شمسی توانائی (سولر) نظام کی باقاعدہ افتتاحی تقریب نہایت وقار، نظم و ضبط اور خوبصورتی کے ساتھ منعقد ہوئی۔ تقریب کے مہمانِ خصوصی صدر چیمبر آف کامرس اینڈ انڈسٹری رحیم یار خان میاں محمد عامر شہباز تھے، جنہوں نے فیتہ کاٹ کر منصوبے کا باقاعدہ افتتاح کیا۔
​اس پروقار تقریب میں شہر کی ممتاز سماجی، تعلیمی، کاروباری اور تنظیمی شخصیات نے بڑی تعداد میں شرکت کی۔ نمایاں شرکاء میں رانا افتخار رسول، چوہدری امتیاز، چوہدری محمد اکمل، رانا محمد امجد، چوہدری عبدالحفیظ، نذیر گل، ندیم درانی، شاہنواز، اکبر عباس، میاں عثمان رفیق، چوہدری محمد علی، میاں اعجاز اشرف، انیلہ صدف، رانا شہباز صفدر اور مقصود احمد شامل تھے۔
​تقریب سے خطاب کرتے ہوئے مہمانِ خصوصی میاں محمد عامر شہباز اور دیگر معزز مہمانوں نے تعلیمی ادارے میں 35 کلو واٹ شمسی توانائی کے نظام کی تنصیب کو ایک انتہائی خوش آئند، دور اندیش اور قابلِ تحسین اقدام قرار دیا۔ مقررین کا کہنا تھا کہ توانائی کے موجودہ بحران کے پیشِ نظر سرکاری تعلیمی اداروں کا شمسی توانائی پر منتقل ہونا وقت کی اہم ترین ضرورت ہے۔ یہ منصوبہ نہ صرف بجلی کے بلوں میں نمایاں بچت اور بلا تعطل بجلی کی فراہمی کو یقینی بنائے گا بلکہ ماحول دوست اقدامات اور طلبہ کو جدید سہولیات کی فراہمی کی جانب بھی ایک سنگِ میل ثابت ہوگا۔
​اس موقع پر اسکول کے پرنسپل شاہد سلیم چوہدری نے تقریب میں تشریف لانے والے تمام معزز مہمانانِ گرامی کا پرتپاک خیرمقدم کیا اور ان کی آمد، حوصلہ افزائی اور ادارے کی ترقی کے لیے نیک تمناؤں کے اظہار پر دلی تشکر ادا کیا۔ انہوں نے اس عزم کا اعادہ کیا کہ اسکول انتظامیہ محدود وسائل کے باوجود طلبہ کو معیاری تعلیم اور بہترین تعلیمی ماحول فراہم کرنے کے لیے ہمہ وقت کوشاں ہے اور یہ سولر منصوبہ اسی سلسلے کی ایک کڑی ہے۔
​تقریب کے اختتام پر معزز مہمانوں نے اسکول کے مختلف حصوں کا دورہ کیا، صفائی ستھرائی اور تعلیمی معیار کو سراہا اور ادارے کی مزید ترقی و خوشحالی کے لیے دعا کی۔ بلاشبہ یہ کامیابی روشن توانائی، معیاری تعلیم اور پائیدار مستقبل کی جانب ایک اور شاندار قدم ہے۔

اس خبر پر اپنی رائے کا اظہار کریں

اپنا تبصرہ بھیجیں