ساہیوال(چوہدری محمد آ صف ندیم آرائیں ڈویژنل بیوروچیف ساہیوال )گورنمنٹ بوائز ہائی سکول 89/6R (علی گڑھ) میں انسداد ڈینگی کے سلسلے میں سیمینار کا انعقاد کیا گیا۔ سی ای او ایجوکیشن چوہدری محمدسعید تقریب کے مہمان خصوصی تھے جبکہ ڈسٹرکٹ ایجوکیشن آفیسر خادم حسین موہل، ریاض بھٹی، محمود الحسن، قاری تنزیل الرحمان اور قاری عبدالمنان نے بھی شرکت کی۔تقریب میں سکول کے ٹیچرز اور طلبہ کی کثیرتعداد نے شرکت کی۔سی ای او ایجوکیشن چوہدری محمد سعید نے شرکاء کو ڈینگی سے بچاؤ کے ضابطہ اخلاق سے آگاہ کیا اور کہا کہ گھروں کے اندر کھلے برتنوں، کولرز اور گملوں میں پانی نہ کھڑا ہونے دیں تاکہ ڈینگی مچھر کی افزائش کو کنٹرول کیا جا سکے۔ انہوں نے کہا کہ ڈینگی لاروا کی افزائش روکنا عوام کے بھرپور تعاون کے بغیر ممکن نہیں۔انہوں نے کہا کہ ماحول کو صاف ستھرا رکھ کرہی ڈینگی کا خاتمہ کیا جا سکتا ہے۔ تمام طلبا کو چاہئے کہ وہ ڈینگی بخار کے حوالے سے گھر والوں اور اردگرد کے لوگوں میں زیادہ سے زیادہ شعور اجاگر کریں تا کہ اس مرض کا خاتمہ ممکن ہو سکے۔بعدازاں ڈینگی بخار سے بچاؤ اور احتیاطی تدابیر بارے آگہی کے سلسلہ میں واک کا بھی اہتمام کیا گیا جس میں سٹوڈنٹس نے بھر پور شرکت کی۔
