رحمتِ الٰہی: گناہ گاروں کے لیے امید کا آخری سہارا

Spread the love

تحریر:
سعد محمد مدنی
فاضل مدینہ یونیورسٹی، مدینہ منورہ، سعودی عرب

انسان کی پوری زندگی امید اور خوف کے درمیان گزرتی ہے۔ کبھی کامیابیاں اسے مطمئن کرتی ہیں تو کبھی لغزشیں اسے بے چین کر دیتی ہیں۔ لیکن انسان کی سب سے بڑی بدقسمتی یہ نہیں کہ وہ گناہ کر بیٹھے، بلکہ اصل محرومی یہ ہے کہ وہ اپنے رب کی رحمت سے ناامید ہو جائے۔ گناہ انسان کی کمزوری ہے، مگر مایوسی شیطان کی کامیابی ہے۔ یہی وجہ ہے کہ قرآنِ مجید بار بار انسان کو اس کے رب کی رحمت کا یقین دلاتا ہے اور اسے توبہ و رجوع کا راستہ دکھاتا ہے۔

اسلام وہ واحد دین ہے جو گناہ گار کے سامنے مایوسی کا دروازہ بند اور امید کا دروازہ ہمیشہ کھلا رکھتا ہے۔ اللہ تعالیٰ اپنے محبوب رسول حضرت محمد ﷺ کو حکم دیتے ہیں کہ پوری انسانیت تک یہ پیغام پہنچا دیں:

“کہہ دیجیے: اے میرے وہ بندو جنہوں نے اپنی جانوں پر زیادتی کی ہے! اللہ کی رحمت سے مایوس نہ ہو۔ بے شک اللہ تمام گناہوں کو معاف کر دیتا ہے، یقیناً وہی بہت بخشنے والا، نہایت رحم کرنے والا ہے۔”
(سورۃ الزمر: ٥٣)

یہ صرف ایک آیت نہیں بلکہ ہر اس دل کے لیے زندگی کا پیغام ہے جو اپنے ماضی کے بوجھ تلے دبا ہوا ہے۔ اللہ تعالیٰ نے یہاں گناہ گاروں کو اپنے بندے کہہ کر مخاطب کیا، گویا گناہوں کی کثرت بھی بندے کو اللہ کی رحمت سے محروم نہیں کرتی، اگر وہ اخلاص کے ساتھ اپنے رب کی طرف پلٹ آئے۔

یہی مضمون ایک اور مقام پر نہایت جامع انداز میں بیان فرمایا:

“اور میری رحمت ہر چیز کو اپنے احاطے میں لیے ہوئے ہے۔”
(سورۃ الأعراف: ١٥٦)

اس مختصر جملے میں رحمتِ الٰہی کی ایسی وسعت بیان ہوئی ہے جس کی کوئی حد نہیں۔ زمین کی ہر نعمت، آسمان کی ہر برکت، زندگی کی ہر سانس اور معافی کی ہر امید اسی رحمت کا مظہر ہے۔ دنیا میں ہر مخلوق اس رحمت سے فائدہ اٹھاتی ہے، لیکن آخرت میں اس کی کامل نعمت ان لوگوں کو نصیب ہوگی جو ایمان، تقویٰ اور اطاعت کی راہ اختیار کریں گے۔

رسول اللہ ﷺ نے اللہ تعالیٰ کی رحمت کا ایسا نقشہ کھینچا ہے جس سے بندے کے دل میں امید کی نئی روشنی پیدا ہو جاتی ہے۔ آپ ﷺ نے فرمایا کہ اللہ تعالیٰ نے مخلوق کو پیدا کرنے کے بعد اپنے پاس عرش کے اوپر لکھی ہوئی کتاب میں لکھ دیا:

“بے شک میری رحمت میرے غضب پر غالب ہے۔”
(صحیح بخاری، صحیح مسلم)

ایک دوسری روایت میں فرمایا:

“بے شک میری رحمت میرے غضب پر سبقت لے گئی ہے۔”

یہ اعلان اس حقیقت کی طرف رہنمائی کرتا ہے کہ اللہ تعالیٰ سزا دینے پر قادر ہونے کے باوجود معاف کرنا پسند فرماتا ہے۔ وہ اپنے بندوں کی ہلاکت نہیں بلکہ ان کی اصلاح چاہتا ہے۔ اسی لیے اس نے توبہ کا دروازہ آخری لمحے تک کھلا رکھا ہے۔

رسول اللہ ﷺ نے فرمایا:

“بے شک اللہ تعالیٰ رات کے وقت اپنی رحمت کا ہاتھ پھیلاتا ہے تاکہ دن میں گناہ کرنے والا توبہ کر لے، اور دن کے وقت اپنا ہاتھ پھیلاتا ہے تاکہ رات میں گناہ کرنے والا توبہ کر لے، یہاں تک کہ سورج مغرب سے طلوع ہو جائے۔”
(صحیح مسلم، حدیث: ٢٧٥٩)

اس حدیث میں کتنی بڑی بشارت ہے! انسان دن میں گناہ کرے یا رات میں، دروازہ بند نہیں ہوتا۔ اللہ تعالیٰ انتظار کرتا ہے کہ میرا بندہ پلٹ آئے۔ وہ اس کے لوٹنے سے خوش ہوتا ہے، اس کی توبہ قبول فرماتا ہے اور اس کے گناہوں کو معاف کر دیتا ہے۔

رحمتِ الٰہی کو سمجھانے کے لیے رسول اللہ ﷺ نے ایک ایسا منظر بیان فرمایا جو ہر دل کو نرم کر دیتا ہے۔ جنگ کے بعد کچھ قیدی لائے گئے۔ ان میں ایک ماں اپنے شیر خوار بچے کو بے چینی سے تلاش کر رہی تھی۔ جب وہ ملا تو اس نے اسے اپنے سینے سے چمٹا لیا اور دودھ پلانے لگی۔ آپ ﷺ نے صحابہ کرام رضی اللہ عنہم سے پوچھا:

“کیا تمہارا خیال ہے کہ یہ ماں اپنے بچے کو آگ میں ڈال سکتی ہے؟”

سب نے عرض کیا: ہرگز نہیں۔

آپ ﷺ نے فرمایا:

“اللہ تعالیٰ اپنے بندوں پر اس ماں سے بھی زیادہ رحم فرمانے والا ہے۔”
(صحیح بخاری، صحیح مسلم)

دنیا میں ماں کی محبت کو محبت کی آخری مثال سمجھا جاتا ہے، لیکن رسول اللہ ﷺ نے فرمایا کہ اللہ تعالیٰ کی رحمت اس سے بھی کہیں زیادہ وسیع ہے۔

اسی طرح ایک حدیثِ قدسی میں اللہ تعالیٰ فرماتا ہے:

“میں اپنے بندے کے میرے بارے میں گمان کے مطابق ہوتا ہوں، اور جب وہ مجھے یاد کرتا ہے تو میں اس کے ساتھ ہوتا ہوں۔ اگر وہ ایک بالشت میرے قریب آتا ہے تو میں ایک ہاتھ اس کے قریب آتا ہوں، اور اگر وہ چل کر میرے پاس آتا ہے تو میں اس کے پاس دوڑ کر آتا ہوں۔”
(صحیح بخاری، صحیح مسلم)

یہ الفاظ بندے کے دل میں امید، محبت اور تعلقِ الٰہی کو زندہ کر دیتے ہیں۔ اللہ تعالیٰ بندے سے دور نہیں، بلکہ بندہ ایک قدم بڑھاتا ہے تو اللہ تعالیٰ اپنی رحمت کے ساتھ اس سے کہیں زیادہ قریب ہو جاتا ہے۔

رسول اللہ ﷺ نے ایک اور موقع پر فرمایا:

“اس ذات کی قسم جس کے ہاتھ میں میری جان ہے! اگر تم گناہ نہ کرتے تو اللہ تعالیٰ تمہیں ہٹا دیتا اور ایسے لوگوں کو لے آتا جو گناہ کرتے، پھر اللہ تعالیٰ سے بخشش مانگتے، تو وہ انہیں معاف فرما دیتا۔”
(صحیح مسلم، حدیث: ٢٧٤٩)

اس حدیث کا مقصد گناہ کی اجازت دینا نہیں بلکہ توبہ کی عظمت کو واضح کرنا ہے۔ انسان معصوم نہیں، لیکن اللہ تعالیٰ نے اسے توبہ کا عظیم سرمایہ عطا فرمایا ہے۔ کامیاب وہ نہیں جو کبھی خطا نہ کرے، بلکہ کامیاب وہ ہے جو ہر خطا کے بعد اپنے رب کے حضور جھک جائے۔

قیامت کے دن بھی رحمتِ الٰہی کا ایک حیرت انگیز منظر سامنے آئے گا۔ رسول اللہ ﷺ نے فرمایا کہ اللہ تعالیٰ مومن کو اپنے قریب کرے گا، اس سے اس کے گناہوں کا اقرار کروائے گا، یہاں تک کہ بندہ سمجھے گا کہ اب میری ہلاکت یقینی ہے۔ پھر اللہ تعالیٰ فرمائے گا:

“میں نے دنیا میں بھی تمہارے ان گناہوں پر پردہ ڈالا تھا اور آج بھی میں انہیں تمہارے لیے معاف کرتا ہوں۔”
(صحیح بخاری، صحیح مسلم)

یہ الفاظ اس بندے کے لیے کتنے اطمینان کا باعث ہوں گے جس نے دنیا میں اپنے رب سے تعلق قائم رکھا، اس سے معافی مانگی اور اس کی طرف رجوع کرتا رہا۔

البتہ قرآنِ کریم ایک اہم حقیقت سے بھی آگاہ کرتا ہے:

“ہماری طرف وحی کی گئی ہے کہ عذاب اس شخص پر ہے جو جھٹلائے اور منہ موڑ لے۔”
(سورۃ طٰہٰ: ٤٨)

گویا اللہ تعالیٰ کی رحمت بے کنار ضرور ہے، لیکن وہ سرکشی، تکبر اور حق سے اعراض کا جواز نہیں بن سکتی۔ اللہ تعالیٰ کی رحمت کا سب سے بڑا حق دار وہ ہے جو اپنی غلطی کو غلطی سمجھے، ندامت کے ساتھ اپنے رب کے سامنے جھکے اور اپنی زندگی بدلنے کا عزم کرے۔

آج ہمارا معاشرہ گناہوں سے زیادہ مایوسی، بے سکونی، اضطراب اور روحانی خلا کا شکار ہے۔ ایسے وقت میں قرآن و سنت کا یہ پیغام ہر گھر، ہر مسجد، ہر تعلیمی ادارے اور ہر دل تک پہنچنے کی ضرورت ہے کہ اللہ تعالیٰ کی رحمت کبھی ختم نہیں ہوتی، اس کا دروازہ کبھی بند نہیں ہوتا اور اس کی مغفرت سے بڑا کوئی گناہ نہیں، سوائے اس شخص کے جو خود ہی اپنے رب سے منہ موڑ لے۔

آئیے! ہم اپنے رب کی طرف پلٹ آئیں۔ اس سے معافی مانگیں، اس کی رحمت پر یقین رکھیں، اپنے گناہوں پر ندامت اختیار کریں اور اس امید کے ساتھ زندگی گزاریں کہ جس رب نے دنیا میں ہمیں بارہا سنبھالا ہے، وہ قیامت کے دن بھی اپنی رحمت سے ہمیں ڈھانپ لے گا۔

اللہ تعالیٰ ہمیں اپنی رحمت کا سچا امیدوار، اخلاص کے ساتھ توبہ کرنے والا، اس کی مغفرت پر یقین رکھنے والا اور اس کی رضا کے راستے پر چلنے والا بندہ بنا دے۔ آمین۔

اس خبر پر اپنی رائے کا اظہار کریں

اپنا تبصرہ بھیجیں