پاکستان میں حالیہ دنوں میں دہشت گردی کے بڑھتے ہوئے واقعات، خاص طور پر پارہ چنار میں قافلے پر حملے جیسے سانحات، عوام میں شدید خوف و غم و غصے کا باعث بنے ہیں۔ اس واقعے کی مذمت کرتے ہوئے ایم کیو ایم برطانیہ کے صدر چوہدری الطاف شاہد نے کہا ہے کہ حکومت کو اس سانحے کی جامع تحقیقات کرنی چاہیے اور مجرموں کو سخت سزائیں دینی چاہئیں تاکہ مستقبل میں ایسے حملوں کی روک تھام ہوسکے۔
لندن عارف چودھری
چودھری الطاف شاہد نے پاکستان میں موجودہ سیاسی عدم استحکام اور معاشی بحران پر تشویش کا اظہار کرتے ہوئے کہا کہ ان مسائل کے ساتھ ساتھ دہشت گردی کا بڑھتا ہوا رجحان بھی ایک بہت بڑا خطرہ ہے۔ انہوں نے زور دیا کہ تمام سیاسی قوتوں اور عوام کو متحد ہوکر ان چیلنجز کا مقابلہ کرنا ہوگا۔ انہوں نے کہا کہ پاک فوج نے دہشت گردی کے خلاف جو قربانیاں دی ہیں انہیں فراموش نہیں کیا جاسکتا۔
اس وقت پاکستان کو کئی محاذوں پر سنگین مشکلات کا سامنا ہے۔ ایک طرف معاشی بحران عوام کی زندگیوں کو مشکل بنا رہا ہے تو دوسری طرف دہشت گردی کے واقعات امن و امان کے لیے خطرہ بن رہے ہیں۔ ایسے حالات میں سیاسی استحکام، حکومت کی فوری اور موثر کارروائی، اور عوام میں اتحاد کو فروغ دینا نہایت ضروری ہے تاکہ ان مسائل کا حل ممکن بنایا جاسکے۔
