شہادت
تحریر: چوہدری الطاف شاہد سدھو
حالیہ مجوزہ آئینی ترمیم نمبر 27، جس کے تحت اوورسیز پاکستانیوں کی دوہری شہریت ختم کرنے کی بات کی جا رہی ہے، نے ایک بار پھر اس تلخ حقیقت کو نمایاں کر دیا ہے کہ پاکستان کے لئے قربانیاں دینے والے اور پاکستان سے فائدہ اٹھانے والے دو الگ طبقے ہیں۔ ایک وہ طبقہ ہے جو بیرون ملک دن رات محنت کر کے اپنے وطن کے لیے زرمبادلہ بھیجتا ہے، اور دوسرا وہ طبقہ ہے جو ملکی وسائل پر پل کر اپنی دولت باہر کے ملکوں میں منتقل کرتا ہے۔
دہائیوں سے اوورسیز پاکستانی ملکی معیشت کی ریڑھ کی ہڈی ثابت ہوئے ہیں۔ مشرقِ وسطیٰ، یورپ، برطانیہ، امریکہ اور خلیجی ممالک میں لاکھوں پاکستانی محنت مزدوری، کاروبار اور پیشہ ورانہ خدمات کے ذریعے پاکستان کے خزانے کو مضبوط بناتے ہیں۔ وہ اپنے خاندانوں کی کفالت کے ساتھ ساتھ ملکی ترقی میں بھی حصہ ڈال رہے ہیں۔ ہر سال تیس ارب ڈالر سے زیادہ کی ترسیلاتِ زر پاکستان آتی ہیں، جو حکومت کے لیے آکسیجن کی حیثیت رکھتی ہیں۔ ان محبِ وطن پاکستانیوں کے بغیر ملک کی معیشت کب کی دم توڑ چکی ہوتی۔ لیکن افسوس کہ یہی لوگ اکثر سیاسی فیصلوں میں نظرانداز کیے جاتے ہیں، ان کے ووٹ کے حق پر پابندیاں لگائی جاتی ہیں، اور اب ان کی دوہری شہریت پر سوال اٹھا کر ان کی وفاداری پر شک کیا جا رہا ہے۔
اوورسیز پاکستانی صرف اپنی سہولت یا مستقبل کے تحفظ کے لیے دوسری شہریت اختیار کرتے ہیں۔ وہ اس لیے نہیں کہ پاکستان سے منہ موڑ لیا ہو بلکہ اس لیے کہ ان کے بچوں کو بہتر تعلیم اور روزگار کے مواقع مل سکیں۔ ان کی محبت، ان کا سرمایہ، ان کا دل آج بھی پاکستان میں دھڑکتا ہے۔ وہ اپنے پیاروں کے لیے پیسہ بھیجتے ہیں، ملک میں سرمایہ کاری کرتے ہیں، کاروبار کھولتے ہیں، ہسپتال اور سکول بنواتے ہیں۔ ان کی وفاداری عمل سے ثابت ہوتی ہے، الفاظ سے نہیں۔
اس کے برعکس وہ بیوروکریٹس ہیں جو برسوں سے قومی وسائل پر عیش کر رہے ہیں۔ ان کے بچے لندن اور ٹورنٹو میں تعلیم حاصل کر رہے ہیں، ان کی جائیدادیں دبئی، دوحہ اور نیویارک میں ہیں۔ وہ عوامی عہدوں پر رہتے ہوئے بھی اپنے خاندانی مستقبل کی ضمانت بیرون ملک ڈھونڈتے ہیں۔ افسوس کی بات یہ ہے کہ وہی لوگ دوسروں پر حب الوطنی کے لیکچر دیتے ہیں جن کے اپنے بنک اکاؤنٹس اور پاسپورٹ غیر ملکی ہیں۔
پاکستان کا عام محنت کش جو خلیجی گرمی میں پسینہ بہا کر اپنا رزق کماتا ہے، اسے دوہری شہریت رکھنے پر مشکوک بنا دیا جاتا ہے۔ لیکن وہ افسران اور سیاستدان جو قومی خزانہ لوٹ کر بیرون ملک جائیدادیں بناتے ہیں، ان سے کوئی باز پرس نہیں ہوتی۔ یہ دوہرا معیار اس ملک کی بدقسمتی ہے۔ اگر حب الوطنی کا پیمانہ پاکستانی شہریت ہے، تو پھر سب کے لیے ایک ہی قانون ہونا چاہیے۔ کوئی بیوروکریٹ، جج یا سیاستدان دوسری شہریت نہیں رکھ سکتا۔
حکومت کو چاہیے کہ وہ اوورسیز پاکستانیوں کو سزا دینے کے بجائے ان کی قربانیوں کو تسلیم کرے۔ انہیں نمائندگی، ووٹ کا حق، اور پالیسی سازی میں شمولیت دی جائے۔ ان کے لیے سرمایہ کاری کے محفوظ مواقع پیدا کیے جائیں، اور ان کی جائیدادوں کو قبضہ مافیا سے تحفظ دیا جائے۔ اسی طرح بیوروکریٹس اور حکومتی افسران کے لیے قانون بنایا جائے کہ وہ کسی غیر ملکی شہریت، غیر ملکی جائیداد یا اکاؤنٹ کے اہل نہ ہوں۔
یہ بھی حقیقت ہے کہ اوورسیز پاکستانی نہ صرف معیشت بلکہ قومی تشخص کے سفیر بھی ہیں۔ دنیا کے ہر کونے میں وہ پاکستان کا نام بلند کر رہے ہیں۔ جب ملک میں زلزلہ یا سیلاب آتا ہے تو سب سے پہلے یہی لوگ چندہ جمع کر کے امداد بھیجتے ہیں۔ ان کے دلوں میں پاکستان کے لیے محبت خالص ہے، کیونکہ ان کا وجود دو ملکوں میں ضرور ہے، مگر روح صرف ایک وطن سے وابستہ ہے — پاکستان سے۔
اگر حکومت واقعی ملک سے وفاداری کا معیار طے کرنا چاہتی ہے تو اسے پہلے اپنے طاقتور اداروں میں جھانکنا ہوگا، جہاں سے قومی دولت بہہ کر باہر جا رہی ہے۔ جب تک بیوروکریٹس، سیاستدان اور طاقتور طبقے اپنے مفادات بیرون ملک رکھتے رہیں گے، وفاداری کے نعروں کا کوئی فائدہ نہیں۔
سوال آج بھی وہی ہے: زیادہ وفادار کون ہے؟ وہ محنت کش جو اپنی کمائی پاکستان بھیجتا ہے، یا وہ بیوروکریٹ جو پاکستان کا پیسہ باہر بھیجتا ہے؟
