نومولود بچے زندہ یا مردہ کیوں پھینک جاتے ہیں

Spread the love

(تحریر سکندر ملک )
ڈسٹرکٹ وزیراباد۔ لوگ
نومولود بچے زندہ یا مردہ کیوں پھینک جاتے ہیں : ہمارے معاشرے کا المیہ ۔
ہمارے معاشرے کے اجتماعی ضمیر پر ایک گہرا سوالیہ نشان بھی ہے۔ یہ سانحہ کسی ایک فرد یا خاندان کی نہیں بلکہ پورے سماج کی ناکامی کی عکاسی کرتا ہے۔یہ واقعات
ہمیں یہ سوچنے پر مجبور کرتے ہیں کہ آخر وہ کون سے حالات ہوتے ہیں ۔جو ایک نومولود، جو زندگی کی علامت ہوتا ہے، نومولود بچے کو اس حال تک پہنچا دیتے ہیں کہ اسے تنہا اور بے یار و مددگار چھوڑ دیا جائے۔ یہ صرف غربت کا مسئلہ نہیں، بلکہ سماجی بے حسی، اخلاقی زوال، خوف، جہالت اور کمزور سماجی ڈھانچے کا مجموعہ ہے۔
ہمارے معاشرے میں آج بھی غیر شادی شدہ ماں، ناپسندیدہ حمل یا معاشی دباؤ جیسے مسائل کو عزت اور ہمدردی کے بجائے نفرت اور بدنامی سے جوڑا جاتا ہے۔ ایسے میں کمزور اور مجبور افراد خوف کے مارے غلط فیصلے کر بیٹھتے ہیں۔ یہ خوف دراصل معاشرے کا پیدا کردہ ہوتا ہے، جہاں غلطی کی اصلاح کے دروازے بند اور رسوائی کے دروازے کھلے رکھے جاتے ہیں۔
یہ واقعہ ریاستی اور سماجی اداروں کی ناکامی کی بھی نشاندہی کرتا ہے۔ اگر صحت، فلاح اور سماجی تحفظ کے نظام مضبوط ہوتے، اگر لوگوں کو یہ اعتماد ہوتا کہ مشکل وقت میں ان کی مدد کی جائے گی، تو شاید ایسے سانحات جنم نہ لیتے۔ سوال یہ بھی ہے کہ ہم بطور پڑوسی، بطور رشتہ دار اور بطور معاشرہ کہاں تھے؟
—یہ منظر ہمیں بتاتا ہے کہ جب انسان اپنی ذمہ داریاں بھول جائے تو انسانیت درندگی کے ہاتھوں پامال ہو جاتی ہے۔ یہ دراصل جانور کی وحشت نہیں بلکہ انسانی غفلت کی انتہا ہے۔
میڈیا اور سوشل میڈیا پر ایسے واقعات پر وقتی شور مچتا ہے، مگر چند دن بعد سب کچھ فراموش کر دیا جاتا ہے۔ اصل ضرورت خود احتسابی کی ہے۔ ہمیں سوچنا ہوگا کہ ہم نے ایک ایسا معاشرہ کیوں تشکیل دیا جہاں زندگی سے زیادہ عزت کے نام نہاد معیار اہم ہو گئے ہیں۔
آخریہ واقعات ہم سب کے لیے ایک آئینہ ہے۔ اگر ہم نے اپنی سوچ، رویے اور سماجی نظام کو نہ بدلا تو ایسے سانحات بار بار ہمارے ضمیر کو جھنجھوڑتے رہیں گے۔ ایک مہذب معاشرہ وہی ہوتا ہے جو کمزور کی حفاظت کرے، نہ کہ اسے تنہائی میں مرنے کے لیے چھوڑ دے۔

اس خبر پر اپنی رائے کا اظہار کریں

اپنا تبصرہ بھیجیں