فرینڈز آف وہاڑی یوکے کے صدر برطانیہ کی ممتاز کاروباری شخصیت حافظ محمد عبداللہ نے پاکستان سے آئے ہوئے وھاڑی چیمبر آف کامرس اینڈ انڈسٹری کے وفد کے اعزاز میں مانچسٹر کے مقامی ریسٹورنٹ میں ظہرانہ دیا
رپورٹ عارف چودھری
فرینڈز آف وھاڑی یُوکے کے صدر حافظ محمد عبداللہ نے پاکستان سے آئے ھوئے وھاڑی چیمبر آف کامرس اینڈ انڈسٹری کے وفد کے اعزاز میں مانچسٹر کے مقامی ریسٹورنٹ میں ظہرانہ دیا۔ پاکستان سے آنے والے وفد میں وھاڑی چیمبر آف کامرس اینڈ انڈسٹری کے سابق صدر محمد غضنفر علی ، شوکت طُور اور ملک عمران اسلم اعوان شامل تھے ۔ یوکے پاکستان چیمبر آف کامرس اینڈ انڈسٹری کے قائمقام صدر اشتیاق احمد نے بھی خصوصی شرکت کی ۔ اس موقع پر سابق بیوروکریٹ نصر اقبال چوھدری ، کاروباری سیاسی شخصیت فخر اقبال چوھدری، ملک ذوالفقار اور جعفر حسین بھی موجود تھے جنہوں نے مہمانوں کا پُر تپاک استقبال کیا اور مانچسٹر آنے پر انہیں خوش آمدید کہا ۔ اس موقع پر گفتگو کرتے ھوئے فرینڈز آف وھاڑی یُوکے کے صدر حافظ محمد عبداللہ نے کہا کہ پاکستان اور برطانیہ کے دیرینہ اور گہرے معاشی اور تجارتی تعلقات ھیں ۔ اس طرح کے وفود کے تبادلے سے ان تعلقات کو مزید مضبوط کرنے میں مدد ملے گی ۔یو کے پاکستان چیمبر آف کامرس اینڈ انڈسٹری کے قائمقام صدر اشتیاق احمد نے بتایا کہ ان کی دعوت پر وھاڑی ، ساھیوال ، اٹک اور رحیم یار خان کے چیمبرز آف کامرس اینڈ انڈسٹریز نے برطانیہ کا دورہ کیا ھے اور پاکستان اور برطانیہ کی پہلی مشترکہ چیمبرز کانفرنس میں شرکت کی ھے ۔دفود کے اس تبادلےسے پاکستان کی برآمدات میں اضافے کے لئے دور رس اثرات مرتب ھوں گے اور باھمی تجارت کے نئے امکانات تلاش کرنے میں مدد ملے گی ۔ انہوں نے کہا کہ یُوکے پی سی سی آئی وھاڑی چیمبر آف کامرس اینڈ انڈسٹریز کے ساتھ اپنے روابط کو مزید مضبوط بنائے گا ۔ وھاڑی چیمبر آف کامرس اینڈ انڈسٹری کے سابق صدر محمد غضنفر علی نے کہا کہ پاکستان کے مختلف چیمبرز کا برطانیہ کا دورہ خوش آئند ھے ۔ انہوں نے یوکے پاک چیمر آف کامرس اینڈ انڈسٹری کے ذمہ داران کو کامیاب کانفرنس کے انعقاد پر مبارکباد پیش کی اور شاندار مہمان نوازی پر اپنے میزبانوں کا شکریہ ادا کیا ۔ فخر اقبال چوھدری نے کہا کہ برطانیہ پاکستان کی برآمدات کی ایک بڑی منڈی ھے اور ان وفود کی آمد سے باھمی تجارتی تعلقات مزید مضبوط ھوں گے ۔غزالی ایجوکیشن ٹرسٹ یوکے کے سی ای او نصر اقبال چوھدری نے کہا کہ پاک برطانیہ دو طرفہ تجارتی اور سرمایہ کاری کے تعلقات میں مزید اضافے کی گنجائش موجود ھے ۔ زراعت اور ٹیکسٹائل کے علاوہ دیگر شعبوں جیسے انفارمیشن ٹیکنالوجی وغیرہ میں بھی پاکستان کی خدمات سے فائدہ اٹھایا جاسکتا ھے ۔ اس طرح کے وفود کے تبادلے سے پاکستان کے کاروباری افراد اور صنعت کاروں کو برطانیہ کی مارکیٹ تک رسائی میں مدد مل سکتی ھے ۔ انہوں نے اس دورے کو خوش آئند قرار دیا اور اس امید کا اظہار کیا کہ آئندہ بھی یو کے پاکستان چیمبر آف کامرس اینڈ انڈسٹری ، پاکستان کے مختلف چیمبرز کے ساتھ مل کر پاکستان اور برطانیہ کے باھمی تجارتی ، معاشی اور سرمایہ کاری کے تعلقات کو فروغ دینے کے لئے کام کرتا رھے گا ۔
