جیکب آباد(نامہ نگار) جیکب آباد کے قریب گھر کی چھت گرنے سے ایک شخص فوت، سیلابی پانی کھڑا ہونے کی وجہ سے میت کو پانی کے اندر سے لے جایا گیا۔ تفصیلات کے مطابق جیکب آباد کی تحصیل ٹھل کے نواحی گاؤں ارسلاح خان بنگلانی میں گھر کی چھت گرنے سے ایک ضعیف العمر شخص خدا بخش سمیجو ملبے کے تلے دب کر فوت ہوگیا، گاؤں کے چاروں اطراف سیلابی پانی کھڑا ہونے کی وجہ سے میت کو قبرستان تک لے جانے میں گاؤں والوں کو شدید مشکلات کا سامنا کرنا پڑا، اس موقع پر گاؤں والوں کا کہنا تھا کہ گاؤں مکمل پانی میں ڈوبا ہوا ہے فوت ہونے والے کی میت کو بڑی دشواری کے بعد پانی سے گذار کر قبرستان تک پہنچایا ہے انہوں نے مطالبہ کیا کہ فلفور گاؤں سے پانی نکالا جائے۔
