جہلم(چوہدری عابد محمود +اسماعیل افتخار)جہلم شہر و گردونواح میں مویشیوں کے باڑے علاقہ مکینوں کے لئے وبال جان بن گئے، کروڑوں روپے کی لاگت سے تیار ہونے والی سیوریج لائنیں بھی ناکارہ ہونے لگیں، لاوارث مویشیوں کیوجہ سے سول لائن روڈ پر لگائے گئے درخت، پھولدار، سایہ دار پودے مویشیوں کے لئے چراگاہ میں تبدیل، شہریوں کا اعلیٰ حکام سے نوٹس لینے کا مطالبہ، تفصیلات کے مطابق شہر کے بااثر افراد نے اندرون شہر کے گلی محلوں میں پالتو جانورجن میں گائے،بکریاں اور بھینسیں شامل ہیں کے لئے باڑے قائم کر رکھے ہیں، جو صبح ہوتے ہی گھروں سے باہر سڑکوں پر نکال دیتے ہیں مویشی کچرے کے ڈھیروں اور سول لائن روڈ سمیت شہر کے گلی محلوں کو ا پنا مسکن بنا لیتے ہیں، آوارہ گائیں اور بھینسیں بعض مقامات پر سڑکوں کے درمیان میں ہی بیٹھ جاتی ہیں جس سے حادثات رونما ہوتے ہیں ان حادثات سے درجنوں موٹر سائیکل سوار زخمی ہو چکے ہیں، اکثر مویشی گندے نالوں میں نہانے کے بعد سڑکوں پر آکر شہریوں کے لئے پریشانی کا سبب بنتے ہیں جبکہ یہ جانور روڈ پر ہی گوبر کرکے گندگی کے ساتھ ساتھ بیماریاں پھیلانے کا موجب بھی بنتے ہیں تمام صورتحال سے آگاہی کے باوجودمیونسپل کارپوریشن کی انتظامیہ، محکمہ ماحولیات کے افسران بااثر افراد کے خلاف کارروائی کرنے سے گریزاں ہیں جبکہ شہریوں کا مطالبہ ہے کہ پالتو جانوروں کو انتظامیہ شہر سے باہر ویران علاقوں میں منتقل کرنے کے احکامات جاری کرے اور اس پر سختی سے عملدارآمد کروایاجائے۔
